خواطر مسافر

24/6/2008




السلام عليكم ورحمة الله وبركاته
خواطر مسافر يجول بين احضان اوطانه ( باللهجة الفلسطينية )
كتبت قبل سنة في عام 2007 في ارشاد سياحي لبعض المناطق المهجره الفلسطينية .


--------------------------


اول ما نبدا ونقول دوم نصلي عالرسول
وتفكر معي بإحسان شو صاير من زمان
زمن النكبة يا إخواني
هدوا بلدنا بإمعان ومحوا أثرها الإسلامي
زرعوا صنوبر بالمكان وقالوا انسوا بالي صار
إحنا هون من زمان ، وصاروا يفتشوا عالاثار
لاقوا اثار إسلامي مع أثار الرومان وما الهم أي أثار
أبو حذيفة اجانا ويفكر معنا بإسهاب ،ويدور على الخراب
من الرويس بدينا وعالدمون مرينا
والبروي ما نسينا ، الجّديده المكر ع اليمين
امشي الدرب المستقيم
وعن ياسيف مرينا أبو سنان تنادينا والكويكات على الدرب
عمقا كان هناك ضرب ،
الشيخ دنون اجينا وبالغابسيه صلينا
النهر والتل على الكبري بتطل
عرب السمنيه بتقول البصه منسيه
الجامع والكنيسة هناك الهم تأسيسه
إذا تمر على الزيب وتشاهد والله التخريب
ام الفرج والسامريه والمزرعه والمنشيه قابل عكا يا خيّ
وإذا وصلت لهناك الجزار والمينا وخان الباشا يلاقينا
وعفيف ينادينا الرمل الكوا عنوان ،
ومشينا اليوم الثاني وفكرنا عالحصباني
ابو حذيفة حكالي النقب ينادينا
بدي انصر اخواني بئر السبع على الدرب
جامعها يشكي للرب
وبعد اللقيه عاليمين بير سقاطه على الطريق
ومشينا عمّ الحيران وهناك كان العنوان
صلينا الجمعه بأمعان وتغدينا بالمكان
واجانا اليوم الثالث من صفوريا بدينا
وعلى الرينة اجينا والناصرة على اليمين والمشهد تحيّنا
عن كفر كنا مرينا والمرشد يحكي للكل
هاي طرعان علينا تطل
والسجره على اليمين ومسكنه مع نمرين
من لوبيا تشاهد حطين وسهولها واراضيها
وبوريه على اليمين وعلى الشمال تلاقينا
بالجامع صلينا هناك شبابنا كرمونا
واحنا بدورنا نحييهم
كملنا على المجدل من طبريا مرينا
وادي الحمام اجينا والقلعه من هناك تشوف
وتكمل على البحره وتشوف هناك الصخره
عايشه عليها نمله وقصر المنيه كمان تشوف اثار اسلامي موقوف
يا قوق ابو شوشه والطابغه والمنصورة
واجانا اليوم اللي بعدوا قالوا اصحوا تبعدوا
اخذت على نفسي وما رافقت عالقدسي
واجانا اليوم الخامس قالوا بدكوا مدارس
اخذونا على بيسان وشرحولنا عن المكان من العفولة بدينا
ونين تطل على الطور وطمره تقول هاي اندور
والنعوره مشهوره وعين جالوت اسطوره
وسجن شطا بالمكان والسخني قابل بيسان
وطلبنا بدنا نصلي قالوا الدحي تصلي وعلى المرج بتطلي
وسألنا عن المكان قالوا صحابي هون كان.
واجانا اليوم السادس يّما البحر غربنا
من الفرديس بدينا وبصرفند صلينا
الشيخ عدلي يخطب بالكل وكفر لام علينا تطل
والطنطورة اجينا عين غزال مرينا
وبإجزم مشينا مع العجوز حكينا وبعين حوض فرينا
وعن جبع حكينا والمزار ما نسينا .
وكملنا اليوم السابع
يم اللد توجهنا ، بالعمري التقينا
والكنيسة عالشمال
والكنيس من القبل
والمركز متوسطهن
وكملنا عالرجلين ، المعصر والمصابن
وخان الحلو عاليمين
ابن الاسود وابن عوف
والفارسي مقام تشوف
ذكرونا بالاجداد ، والمجازر في البلاد
ولما وصلنا عالرمله ، قالوا الجامع هونا كان
ما شفنا الا الاساس والمناره بالمكان وحذيفة ابن اليمان
ولما وصلنا المدينة فكرنا الجامع كنيسه
قالوا نعم يا إخوان ، اسلموا أهل الذمه وغيروها من زمـان .


يتبع .. لكن لا أريد الإطاله عليكم


رحم الله قاريء دعى لي وله
والسلام عليكم ورحمة الله وبركاته .