من طرف اعوذ بالله من الشيطان الرجيم
بسم الله الرحمن الرحيم
السلام عليكم
ممكن افضفض واوجع دماغكم بالحكى اللى يخصنى
انا عارف ان فى ناس هاتطيق وتستحمل تكمل كلامى للنهايه وناس يمكن تقفل من اول ما تفتح الصفحه بس مش مهم حابب اوصل لكم معلومه ؟؟
امممممممممممم كتير سئلونى ليه معصب وليه بتشتم وليه بتضايق من الناس بسرعه
حتى فى موضوع اهداء خص نص للشباب كتبت فى الاول رد ناشف اوى المهم زعل دمعه منى ورجعت مسحته وعدلت فيه شويه
طيب تيجوا تعرفوا ايه مضايقنى ومش بيخلينى استحمل حتى المزاح والضحك
مشاكل وفقر ومرض فى الاهل والبيت
يعنى زواج والدى او مرض اخويا وكده يعنى
اومشاكل شخصيه مع اصحابى
وعاطفيه مع اللى بحبهم سواء اللى حبيتها بجد وعيشت معاها سنتين حلوهم ومرهم او اضطريت اخطبها ( بنت خالى ) لانى اتكلمت عليها والاتنين بيحبونى ومضطر احبهم
طبعا بعضكم هايقول انى طماع بس حطوا نفسكم مكانى هاتجوز واحده محبتهاش بس لمجرد الجواز بعد ما كنت سنين عمرى اللى فاتت بعاملها على انها اختى
وازاى اسيب اللى معاها فى كل حاجه حتى احلامى والله لو ينفع هاتجوز الاتنين عشان مش اجرح او اكسر قلب حد منهم بس ربنا يعين ويسهل
المهم انا مش جى اتكلم فى مشاكلى العاطفيه او مشاكل البيت او حتى بشتكى لكم قدرى ونصيبى فى الدنيا
انا عاوز بس افهم حاجه
الايام اللى فاتت حسيت انى تعبان اوى نفسيا وزهقان من كل حاجه
وانا فى حياتى العاديه مش بحلم ولا حتى بيجى لى كوابيس عارف انها حاجه مش كويسه بس انا فعلا والله يمكن اكتر من سنتين عمرى ما جالى حلم او كابوس
المهم هابدأ اللى شاغلنى واللى حابب اعرضه عليكم
انا وانا صغير كانوا بيقولوا عنى الطفل المعجزه وده لانى كتير كنت هاموت وربنا كان ديما بينقذنى ويحفظنى من اى شر
يعنى مثلا والله
مره كنت عمرى حوالى 8 سنين جاره لينا قالت شوفوا صلاح كبر وشكله بقى حلو المهم هى الظاهر كانت بتحسدنى وحواليها جمع من اهلى وكانوا حريم بنات يعنى المهم والله كلهم سمعوا صوت راجل بيقول ( ماشاء الله عليه اللهم لا حسد ) كلهم كانوا متفاجئين بس عدوها وقالوا انه تهيؤات او مش حقيقه يعنى
بعدها وانا 12 سنه يمكن كان والدى بيشتغل بأدوات النجاره جهاز كهربى بيثقب الخشب وسنه حاد المهم فى سهو من والدى مسكت الجهاز وبدون قصد حطيته على بطنى ودوست على زر التشغيل وفى نفس الوقت والله اللى بيشتغل فيه الجهاز ويلف على التى شيرت بتاعى الكهربا تقطع من غير ما سن الجهاز يجرحنى
وكنت بشوف حاجات غريبه بس مكنتش بحكى لحد لانهم مش هايصدقونى
وحصلت مواقف كتير تانى بس محرج اقولها
يعنى موقف مشابه لقصة سيدنا يوسف مع امرأة العزيز
وبردوا ربنا حفظنى من الغلط
مش هاقول انى نبى ولا انسان صالح انا عادى ده انا حتى بدخن وبحب البنات زى اى شب
حتى لما كبرت احلامى وكوابيسى بشوفها حقيقه بعنيه
وكلها بتتحقق مع الايام والله
يعنى بتبقى كرؤيا صادقه
مشاكلى دى مش مأثره على علاقتى باللى حبيتها فى الاول وهى دايما فى بالى وبتكلمنى كتير
حتى لما قولت لها انى هاتجوز بس محتاجها
قالت لى لا حرام تظلم واحده تانيه وصلى استخاره وشوف ربنا هايوجهك لايه وهنا بدأت مشكلتى الحقيقيه
انا فيا شئ غريب مش قادر اصلى ولا قادر امسك المصحف انا غير كده مش فاهم فيه ايه
ومع المشاكل والوقت حلمت حلم واحد بس
ان البنت اللى بحبها دى جت لى فى حلم وكانت حزينه وقالت لى ( اننا مش لبعض يعنى واللى هايفرقنا اكبر منى ومنها ) مفهمتش معنى الحلم وقلت انها تهيؤات وخرافه
روحت سئلت واحد بيفهم فى تفسير الاحلام
ووصفت له كل حاجه قال لى ان فى حد مننا هايموت
انا او هى او مصيبه كبيره هاتحصل فيكم هاتخليكم تبعدوا عن بعض
المهم هى كلمتنى وفهمت انى متغير وقالت لى مالك حاولت اضحك عليها ومش اقولها على الحلم ولما قالت انها تعبانه خوفت عليها قلت لها
بعدها بيومين كنت سهران بحمل فيلم اجنبى جديد عاجبنى
كانت الساعه يمكن خمسه الفجر
المهم اثناء تحميله انا غلبنى النوم بس قلت حرام اسيب الجهاز شغال على الفاضى هايتعب
قلت انا اريح جسمى على السرير ومش انام وكان جنبى اخويا الكبير نايم بنفس الغرفه المهم انا فى جزء من الدقيقه (يعنى لحظات ) غمضت عينى زى ما بيقولوا النوم يداعب جفونى وحسيت بأيد اتحطت على فمى وايد تانيه
اتحطت على كتفى
فتحت عينى لقيت اتنين شكلهم مش بشر مثلنا يعنى شكلهم غريب بس مش شئ يرعب اويخوف
واحد فضل حاطط ايده على فمى عشان مش اتكلم اما التانى همس فى اذنى وقال ( متخفش انا قريب هاجى وازورك )ياجماعه انا مش فاهم متقولوش ده خيال وحلم انا كنت فاتح عينى وحاسس حتى بعدها قمت وقعدت شويه فى الشباك
لما سئلت شيخ قال لى بلاش تحكى لحد اللى شفته بس انتم محدش يعرفنى شكليا ولا هايعرف يوصلى حتى هيما
بجد
حاسس ان الموت قرب منى اوى
مش عارف لو مت دلوقتى ربنا ها يعمل فيا ايه ؟؟
ياترى راضى عنى ؟؟
بحس كتير والله انه بيحبنى وراضى عنى
والدليل انه حفظنى من شرور كتير زمان وخلانى اعيش لحد دلوقتى
بس انا حاسس ان فى مفاجأه هاتحصل الايام اللى جيه
لذلك انا قلت فى مفاجأه بنتظرها مثلكم
بس هابعد شويه عن النت
نفسى اعمل حاجه تغير حياتى
لو عيشت وليا عمر يعنى
سلام
صحيح انا كتبت حاجه يمكن ادخل قريب احطها فى قسم الشعر بس لو لينا نصيب
ولو حصل نصيب وعيشنا اكيد هاجى لكم تانى
انا مش خايف من الموت
امممممممممممم
ياريت تستغفروا ربنا وتتوبوا بسرعه
الموت فى دقايق وثوانى ومن الجهل انك تفكر ان يوم القيامه بعيد
قيامتك انت مع اول ثانيه بعد موتك
ربنا يرحمنا ويغفر لنا
سلاموناتو
